Lantegi Batuak Bizkaiko 50 udalerrietan baino gehiagotan dago, eta 214 milioi euroko gizarte balio integratua sortzen du urteko

Udalerri bakoitzean desgaitasuna duten pertsonek egiten duten lana ikusarazteko eta lan horri aurpegia jartzeko kanpaina bat jarri du abian.

Lantegi Batuak proiektu berezia da, eta 214 milioi euroko gizarte balio integratua sortzen du Bizkaian.  Lantegi Batuak-en proiektuak 40 urte daramatza lanean gizarte kohesionatuago bat lortzeko, eta enplegu egonkorra sortzen du desgaitasuna duten 2.500 pertsonarentzat baino gehiagorentzat, izan ere, kolektibo horrek zailtasun handiak ditu enplegua lortzeko, eta % 16,5etik gorako langabezia tasa du.

Gaur egun, Lantegi Batuak 50 udalerri baino gehiagotan dago, Bizkaiko 7 eskualdeetan banatuta, dela industria guneen bidez, dela garbiketa, lorezaintza eta digitalizazio zerbitzuak emanez, dela mendekotasuna edo desgaitasuna duten pertsonei egokitutako konponbideak emanez (adibidez, etxera eramateko janaria eta autonomia pertsonaleko produktuak), dela enpresetarako edo bezero pribatuentzako zerbitzuak emanez. Sozialki konprometituta dauden udalerriak dira, kontratazio publikoko politika arduratsuen alde egiten dutenak.

Bizkaian sortutako 214 milioi euroko gizarte balio  integratutik, % 60 kanpainaren protagonista diren 24 udalerrietan biltzen dira. Horietan guztietan, Lantegi Batuak oso presente dago, bai herri horietako gune propioetan industria jarduerak egiten dituelako, bai udalerrirako zerbitzuak egiten dituelako, edo biztanleentzat enplegua sortzen duelako. Honako hauek dira udalerriak, eskualde guztietan banatuta:

Horien guztien ordezkari gisa, Juan Mari Aburto Bilboko alkateak, Ager Izagirre Mungiako alkateak eta Maite Ibarra Arrigorriagako alkateak, kanpaina baten aurkezpenean parte hartu dute gaur. Kanpainaren helburua da udalerri bakoitzean desgaitasuna duten pertsonek egiten duten lana ikusaraztea eta lan horri aurpegia jartzea, haien lan esperientzia eta lekukotasuna emanez.

Era berean, kanpainak agerian utzi nahi du Lantegi Batuak-ek Bizkaiko udalerrietan ematen duen gizarte balioa, eta, aldi berean, eskerrak eman nahi dizkie tokiko administrazioei beren lankidetzagatik eta konfiantzagatik, inklusioaren aldeko apustua egin baitute.

Kanpaina online zabalduko da eta, gainera, markesinetan eta metro geltokietan egongo da.

Sentsibilizazioaren bizkarrezurra webgunea da, eta bertan kontsultatu ahal izango da Lantegi Batuak-ek zer presentzia duen Bizkaiko udalerri bakoitzean, zenbat biztanle dituen herri bakoitzak edo, beste datu batzuen artean, sortutako gizarte balio integratua: www.lantegibatuak.eus/eu/bizkaia

Udalerri horiek Lantegi Batuak-en ezarpenaren erakusgarri dira, bere industria eta zerbitzu guneen sarearen bidez, eta haien adibidea lurraldeko beste leku batzuetara estrapola daiteke.

Bilboren kasua adierazgarria da, izan ere, Lantegi Batuak-en desgaitasuna duten hiru pertsonetatik bat hiriburuko biztanlea da, guztira 852 pertsona. Erakundeak bi industria gune ditu Otxarkoagan eta Zorrotzan, bai eta enplegagarritasunari laguntzeko bulego bat ere. Bilbon urtero sortutako gizarte balio integratua 37 milioi euro da.

Bestalde, Lantegi Batuak-ek urteak daramatza Mungiarekin lankidetzan jarduten, lorezaintzaz arduratzen baita bertan. Guztira, Lantegi Batuak-eko 53 pertsona bizi dira herrian, eta bertan sortutako gizarte balio integratua 17,4 milioi euro da.

Arrigorriagari dagokionez, bertako 38 pertsonak egiten dute lan Lantegi Batuak-en, 2010az geroztik udal kiroldegia garbitzen. Udalerrian sortutako gizarte balio integratua 1,7 milioi euro da.

Amorebieta-Etxanon (16,6 milioi euroko gizarte balio  integratua) eta Zallan (1,2 milioi), lorezaintza eta garbiketa lanak egiteaz gain, Lantegi Batuak-ek industria guneak ditu. Erandion (4,2 milioi), Abadiñon (2,6 milioi) eta Loiun (0,5 milioi), Lantegi Batuak-ek industria guneen bidez sortzen du gizarte balio integratua.

Sektore Publikoko Kontratuen Legea

Administrazio publikoek, Sektore Publikoko Kontratuen Legearen bidez, desgaitasuna duten pertsonentzako lan aukerak bultzatzeko mekanismo bat dute, irabazi asmorik gabeko enplegu gune berezien zerbitzuak kontratatuz.

Desgaitasuna duten pertsonen laneratzeak sortzen duen gizarte balioa oso handia da: gizarte kohesioa, komunitate lotura, lurraldearen gizarte egituraketa, kudeaketa publiko-pribatu partekatuaren efikazia eta efizientzia, beste zainketa sistema formal eta informal batzuk ordeztea, edo osasun sistemetan eta gizarte zerbitzuetan aurreztea.

Bestalde, Lantegi Batuak-ek desgaitasuna duten 200 pertsona baino gehiago Bizkaiko enpresetan laneratzea lortu du azken bost urteetan. Oro har, 2020ko abenduaren 31n, Lantegi Batuak-ek 3.144 kide zituen, horietatik % 82k desgaitasuna zuten, eta gehienak gizarteratzeko eta laneratzeko laguntza premia handiak zituzten pertsonak ziren.